ერთობლივი პანელ-დისკუსია ბათუმის საჯარო ბიბლიოთეკაში
2021 წლის 6 ნოემბერს აკაკი წერეთლის სახელობის ქ. ბათუმის საჯარო ბიბლიოთეკაში ა(ა)იპ აჭარის განათლების ფონდთან (ბათუმის მასწავლებლის სახლი) თანამშრომლობით მოეწყო ერთობლივი პანელ-დისკუსია თემაზე: ,,გოგებაშვილის დედაენა დღეს - ენის სწავლების ტრადიციები და თანამედროვე გამოწვევები“.
27 ოქტომბერს იაკობ გოგებაშვილის დაბადებიდან 181 და ,,დედაენას“ გამოცემიდან 145 წელი შეუსრულდა. შეხვედრა გახსნა ბათუმის საჯარო ბიბლიოთეკის დირექტორის მოადგილემ - ნატალია ჭყონიამ. შეხვედრის მონაწილეებს მიესალმა და გოგებაშვილისეული გამოცემების შესახებ ისაუბრა ბიბლიოთეკის მთავარი წიგნსაცავის განყოფილების უფროსმა - ნატო გიორგაძემ.
პანელ-დისკუსიას წარმართავდა ა(ა)იპ აჭარის განათლების ფონდის (ბათუმის მასწავლებლის სახლი) დირექტორის მ/შ - ლალი ლომთათიძე. შეხვედრის მიზანი იყო იაკობ გოგებაშვილის ,,დედაენის“ წარმოდგენა თანამედროვე მიდგომების ჭრილში; პოზიტიური გამოცდილების გაზიარება, თანამედროვე დამატებით/დამხმარე რესურსებზე ინფორმაციის გაცვლა, საგაკვეთილო პროცესის გაუმჯობესება.
მომხსენებლები იყვნენ აჭარის განათლების ფონდის/ბათუმის მასწავლებლის სახლის დაწყებითი განათლების მიმართულების ტრენერები:
- დალი თურმანიძე - „დედაენა და ონლაინ სწავლება პირველ კლასში - სირთულეები და დაძლევის გზები“;
- მზია სალაძე - „დედაენა- წარმატებისა და სიცოცხლისუნარიანობის საიდუმლო“;
- ლეილა წულუკიძე - „იაკობ გოგებაშვილის „დედაენა“, როგორც საუკეთესო დამხმარე რესურსი სწავლების პროცესში“;
- ნინო ვაშალომიძე - „მესამე თაობის ესგ და დედაენის სწავლების პრინციპი“.
აჭარის განათლების ფონდი/ბათუმის მასწავლებლის სახლი ტრენერებმა აუდიტორიას გაუზიარეს იაკობისეული დედაენით მოზარდებთან მუშაობის გამოცდილება. მათ წარმოაჩინეს გოგებაშვილის მეთოდური მიდგომების დადებითი მხარეები და სირთულეები, თანამედროვე გამოწვევები და მათი დაძლევის გზები; ,,დედაენით“ სწავლების სპეციფიკა ონლაინ საგაკვეთილო პროცესში. ყოველი მოხენების შემდეგ იმართებოდა დისკუსია, რომელშიც მონაწილეობდნენ ბათუმის საჯარო სკოლების დაწყებითი კლასების მოქმედი პედაგოგები.